ګوټېرش: د افغان ښځو انزوا د هغوی ټولنيز مشروعيت او رواني روغتيا له ګواښ سره مخ کوي

د ملګرو ملتونو سرمنشي انتونیو ګوټېرش د افغانستان په اړه خپل تازه راپور کې ويلي چې د طالبانو له‌خوا پر ښځو د بندیزونو دوام، د هغوی ټولنيز حضور، تصميم‌نيونه، او رواني سلامتۍ ته جدي خطر پېښ کړی دی.دغه راپور چې د پنجشنبې په ورځ (۲۹ د غبرګولی) د ملګرو ملتونو امنیت شورا ته سپارل شوی، څرګندوي چې افغان ښځې د محرم شرط، د کار او زده‌کړو بنديزونو له امله له ټولنیزو او عامه فضاوو ورو-ورو شړل کېږي.ګوټېرش ويلي: «د ښځو محروميت يوازې يو فردي بندیز نه، بلکې ژوره ټولنيزه طرد دی، چې د انزوا، خپګان او رواني بحران لامل شوی دی.»نوموړی زياتوي چې افغانستان يوازينی هېواد دی چې د نجونو پر متوسطه او لوړو زده‌کړو سيستماتيک بنديز لګولی دی. هغه ټينګار کړی چې دا ډول بندیزونه د ښځو اساسي بشري حقونه تر پښو لاندې کوي.په راپور کې ويل شوي چې د طالبانو لخوا د “امر بالمعروف” قانون پراخه تطبيق د افغانانو فردي، ټولنيزې او اقتصادي آزادۍ، په ځانګړې توګه د ښځو او نجونو لپاره سختې اغېزمنې کړې دي.د ملګرو ملتونو موندنې ښيي چې يوازې ۷ سلنه افغان ښځې له کوره بهر کار کوي، او ښځې مشره کورنۍ ډېرې له اقتصادي بحرانونو اغېزمنې شوې دي.ګوټېرش ويلي چې دا بندیزونه د افغانستان او نړيوالې ټولنې ترمنځ د رغنده تعامل پر وړاندې لوی خنډ ګرځېدلي دي. هغه له نړيوالې ټولنې غوښتي چې پر طالبانو فشار زيات کړي او له افغان ښځو سره هدفمند ملاتړ ته دوام ورکړي.