د ملګرو ملتونو د امنیت شورا ټاکل شوې ده چې راتلونکې اونۍ د افغانستان په اړه ځانګړې ناسته وکړي

د ملګرو ملتونو د امنیت شورا اعلان کړی چې د راتلونکې دوشنبې په ورځ به د افغانستان د وضعیت په اړه ځانګړې ناسته ترسره کړي.په افغانستان کې د ملګرو ملتونو د مرستندوی دفتر (یوناما) پر ایکس لیکلي چې په دې ناسته کې به رزا اوتنبایوا، د ملګرو ملتونو د سرمنشي ځانګړې استازې او د یوناما مشره، د افغانستان پر روان وضعیت خبرې وکړي.همداراز، د انتونیو ګوترش نوی راپور چې نن پنجشنبه، د غبرګولي ۲۹مه خپور شوی، به هم په دې ناسته کې وړاندې شي.په دې راپور کې راغلي چې د طالبانو د پرله‌پسې بندیزونو له امله، افغان ښځې ورځ تر بلې له ټولنیزو چارو، عامه فضاوو او تعاملاتو څخه منزوي کېږي. دغه بندیزونه لکه د محرم شرط، د زده‌کړې بندیز او د کار کولو منع، د ښځو پر ګډون، معلوماتو ته لاس‌رسی او پر خپلو تصمیمونو د اغېز کولو توان سخت منفي اغېز کړی.ښاغلي ګوترش ټینګار کړی چې د ښځو پر وړاندې بندیزونه، نه یوازې فردي ازادۍ محدودوي، بلکې دا یو ژور ټولنیز حذف بلل کېږي چې د ښځو انزوا، خپګان او پراخه رواني بحران ته لاره هواروي.د ملګرو ملتونو سرمنشي دا وضعیت یو له جدي خنډونو څخه ګڼلی چې افغانستان له نړیوالې ټولنې سره د رغنده تعامل څخه منع کوي، او غوښتنه یې کړې چې پر طالبانو دې فشار زیات شي تر څو د ښځو پر وړاندې د ساختاري سرکوب دا وضعیت پای ته ورسوي.نوموړي له نړیوالې ټولنې غوښتي چې د افغان ښځو ملاتړ ته ځانګړې پاملرنه وکړي او د بندیزونو د لیرې کولو لپاره طالبان تر فشار لاندې راولي.