په جلاوطنۍ کې د افغان ښځو غورځنګ: افغان ښځې په ګاونډیو هېوادونو کې له جنسي تاوتریخوالي او ګواښونو سره مخ دي

په جلاوطنۍ کې د افغان ښځو غورځنګ د نړېوال کډوالۍ د ورځې په مناسبت یو پرېکړه‌لیک خپور کړی او ویلي یې دي چې زرګونه افغان ښځې په ګاونډیو هېوادونو لکه ایران، پاکستان او ترکیه کې له “د نیولو ګواښ، جبري شړلو، بې‌هویتۍ، جبري کار، جنسي تاوتریخوالي، او روغتیايي او تعلیمي خدماتو ته له تبعیض سره د نه‌لاس‌رسۍ” سره مخ دي.په دې پرېکړه‌لیک کې چې نن پنجشنبه، د غبرګولي ۲۹مه خپور شوی، راغلي چې میلیونه افغان وګړي، په ځانګړي ډول ښځې، لا هم د جلاوطنۍ، بې‌سرنوشتي، تبعیض او مطلق بې‌حقۍ په حالت کې ژوند تېروي.غورځنګ زیاتوي، هغه مدني فعاله ښځې، خبریالانې، قاضیانې، وکیلانې، د پوهنتون استادانې او ښوونکې چې د خپلو مدني فعالیتونو یا جنسیت له امله له هېواده وتلې دي، اوس په کډوال‌منلو هېوادونو کې یوازې پاتې شوې او د بیا مېشتېدو هېڅ هیله نه لري. دوی وایي چې د نړېوالې ټولنې، په ځانګړي ډول د UNHCR او هغو هېوادونو چوپتیا چې د افغانستان د سقوط په بهیر کې ښکېل وو، د هغو ښځو پر وړاندې ښکاره ظلم دی چې یوازینی “جرم” یې د زده‌کړو، کار او انساني ژوند غوښتنه ده.یاد غورځنګ خبرداری ورکړی چې د روان وضعیت دوام نه یوازې د بشري حقونو ښکاره نقض او د نړیوالو ژمنو خلاف عمل دی، بلکې د زرګونو افغان کډوالو ښځو لپاره د ژوند او رواني سلامتۍ مستقیم ګواښ هم ګڼل کېږي.په پرېکړه‌لیک کې له ملګرو ملتونو، د بشري حقونو له سازمانونو او له کوربه هېوادونو غوښتنه شوې چې د افغان ښځو او کورنیو جبري شړلو ته د پای ټکی کېږدي، هغوی ته قانوني استوګنځای ورکړي او قانوني ملاتړ ترې وکړي.