د ملګرو ملتونو سرمنشي: افغانستان په تېرو درې میاشتو کې له ۲۰۰۰ زیاتې امنیتي پېښې تجربه کړي

ديانتونیو ګوترش، د ملګرو ملتونو سرمنشي، په خپل وروستي راپور کې چې امنیت شورا ته وړاندې شوی، په افغانستان کې د امنیتي پېښو، پوله‌یزو ترینګلتیاوو او وسله‌والو ډلو له‌خوا د ګواښونو د زیاتوالي په اړه اندېښنه ښودلې ده.د راپور له مخې، د ۲۰۲۵ کال د فبرورۍ له ۱مې تر اپرېل ۳۰مې پورې، ۲۲۹۹ امنیتي پېښې ثبت شوي چې دا د تېر کال د همدې مودې په پرتله درې سلنه زیاتوالی ښيي.په دغو پېښو کې د داعش خراسان ډلې بریدونه لا هم یو له جدي ګواښونو ګڼل شوي دي. دغه ډله د څو بریدونو، په ځانګړي ډول د طالبانو د ښار جوړونې وزارت مخې ته په کابل کې د بمي چاودنې او په کندز ښار کې د یوه خونړي برید مسؤولیت منلی دی.ښاغلي ګوترش د پاکستان سره د پوله‌یزو ترینګلتیاوو زیاتېدو ته هم اشاره کړې چې له امله یې د تورخم بندر لنډمهال تړل شوی او ملکي وګړو ته مرګ‌ژوبله اوښتې ده. د دغو پېښو له جملې څخه یوه یې د مارچ په ۲۸مه د پاکستاني ځواکونو هوايي برید و، چې د پکتیکا ولایت په یوه سیمه کې ۷ ملکي کسان، چې ۳ ماشومان هم پکې شامل و، ووژل شو.په ورته وخت کې له ایران او پاکستان څخه د کډوالو ډله‌ييز راستنېدنه هم د امنیتي وضعیت د خرابېدو لامل شوې او دا پوښتنې راولاړې کړې چې آیا افغانستان د دغې شمېرې راستنوونکو خلکو د جذب او ملاتړ وړتیا لري که نه.د راپور په پای کې، د ملګرو ملتونو سرمنشي ټینګار کړی چې بشرپالې ادارې باید بشپړه بې‌طرفي وساتي، د شخړو پر مهال دې د ملکي وګړو حقوقو ته درناوی وشي، او له ټولو خواوو یې غوښتنه کړې چې د نړیوال بشردوستانه قانون اصولو ته پابند پاتې شي.